कञ्चनपुर,भदौ १५ गते । कञ्चनरुप नगरपालिका भित्रका करिब एक दर्नन भन्दा बढी विद्यालयको स्थलगत अनुगमन गर्दा कतिपय विद्यालयमा कूल विद्यार्थीको १५ प्रतिशत भन्दा पनि कम विद्यार्थी विद्यालय आउने गरेको पाइएको छ ।
शुक्रबार अवलोकित दैनिकको टिम विद्यालय अनुगमन गर्दा सो तथ्य बाहिर आएको छ । कञ्चनरुप नगरपालिका वडा–१ स्थित लक्ष्मीनरायण माबिमा कूल ५ सय २६ जना विद्यार्थीमा शुक्रबार १ सय १७ जना ( २२ प्रतिशत) ,वडा –३ स्थित अधारभूत विद्यालय बरमझियामा कूल ३ सय ८८ विद्यार्थीमा १ सय ७६ जना (४५ प्रतिशत), वडा–११ स्थित भुवनपट्टी अधारभुत  विद्यालयको कूल ३ सय १० मध्ये १ सय १४ जना ( ३६ प्रतिशत), अधारभूत विद्यालय जगतपुरमा कूल दुई सय ५० जनामा ९० जना( ३६ प्रतिशत) विद्यार्थी मात्र विद्यालयमा उपस्थित रहेको थियो ।

नगरप्रमुख वसन्तकुमार मिश्रको घर अगाडी रहेको बालमैत्री विद्यालयको विजोग छ । कूल १ सय ८४ मध्ये १ सय १० जना ( ५९ प्रतिशत) विद्यार्थी मात्रै विद्यालय आएको देखियो । उक्त विद्यालय एक दशक अघि नै बालमैत्री विदालय घोषणा भएपनि खने पानी,शौचालय र खेल मैदानको अवस्था विजोग रहेको छ ।
कञ्चनरुप नगरपालिका–१० स्थित जनता आधारभूत विद्यालयको कूल १ सय ८३ विद्यार्थीमध्ये २७ जना ( १४ प्रतिशत) मात्र उपस्थित भएको देखियो । सोही वडा स्थित प्राथमिक विदालय भोड्हामा कूल १ सय ५५ जना विद्यार्थीमा ५६ जना (३६ प्रतिशत) मात्र उपस्थित  रहेको थियो । विद्यालयमा २५ लाख लागतमा बाउण्ड्रीबाल लगाइएपनि छात्र–छात्राका लागि छुटा छुटै शौचालय छैन । प्राथमिक विद्यालय भोड्हा मात्रै हाईन नगरपालिका अधिकाश प्राथमिक विद्यालयमा छात्र–छात्राका लागि छुटा छुटै शौचालय छैन,भए पनि संचालनमा छैन । कतिपयमा बिग्रेको अवस्था छ ।
नगरपालिकाले पहिलो प्राथमिकतामा राखेको शिक्षाको यो दुरर्वस्थालाई सुधार गर्नुका सट्टा लाखौ रकम खर्च गरेर नगरपालिकालाई ‘फर्जी’बालमैत्री नगर घोषणा गर्नु खुलमखुल्ला भ्रष्टार हुने नाम उल्लेख नगर्ने शर्तमा एक जना प्रधानाध्यापकलृे अवलोकितलाई बताए । विद्यालय अनुगमन गर्दा कतिपय विद्यालयमा शिक्षक समयमा नआएको त कतिपयमा प्रअ समेत विद्यालयमा उपस्थित देखिएन । शिक्षकहरु विद्यालयमा १२ बजे आएपनि सबै दिन १० बजे आएको र ४ बजे गएको हाजरी गर्ने गरेको पाइएको छ ।