कञ्चनपुर,साउन ६ गते । सप्तरीको सप्तकोशी नगरपालिका १ फत्तेपुरको दलित परिवारका ४ जना महिलाहरु माथि गैरदलित पुरुषहरुले कुटपिट गरेका छन् ।

 गत असार २८ गते खेतमा काम गरिरहेका वेला वडा नं. ४ स्थित वलार्दहमा चौधरी समुदायका पुरुषहरुले उनीहरुमाथि निर्घात कुटपिट गरेका हुन । कुटाई खानेमा मंगल रामकी पत्नि ३९ वर्षिया मननदेवी राम, उनका देउरानीहरु ३६ वर्षिया सुनितादेवी राम, ३२ वर्षिया सरोदेवी राम र २८ वर्षिया आरती राम छन् । बलार्दहका देबानन्द चौधरी, लक्ष्मीदेवी चौधरी, रमेश चौधरी, सिर्जना चौधरी, बविता चौधरी र बबिताका देवरलगायतले उनीहरुलाई हत्या गर्ने योजना अनुसार बाँस र भाटाले कुटपिट गरेका थिए । 

कुटपिटका कारण गम्भिर घाईते भएका उनीहरुको विराटनगर स्थित न्युरो अस्पतालमा उपचार भइरहेको छ । जसमध्ये आरतीको अवस्था अहिले पनि सुधार भएको छैन । अहिले पनि वेला वेलामा आफै वेहोस भएर लड्ने गरेको मंगल रामले वताए । उनका अनुसार चौधरीहरुले विगत २÷३ वर्षदेखि जग्गाको विषयमा विवाद गर्दै आएका थिए । पछिल्लो पटक पुरुषहरु कोही नभएका बेला धान रोपीरहेका महिलाहरुलाई घेरा हालेर कुटपिट गरिएको उनको भनाई छ । ‘म पुग्दा कान्छि वुहारीलाई पुर्न कोही खाल्टो खन्दै थिए, कोही कपालमा समातेर घिर्सादै थिए । म छुट्याउन जाँदा मलाई पनि कुटे’ उनले भने ‘उपचार गराएर फर्केपछि प्रहरीले पीडकलाई कारवाही गर्ने कुरामा वास्ता गरेको छैन ।’

राजनीतिक दबाव छ’ भन्दै प्रहरी पन्छिने गरेको पीडितको गुनासो छ ।  समाजका कतिपय ब्यक्तिहरु पीडकसँगै मिल्न दवाव दिईरहेको पनि पीडित रामले वताए । ‘उपचारमा मात्रै करिव ४ लाख रुपैयाँ खर्च भयो । अहिले सवै मिलेर १ लाख लिएर मिल्नु पर्छ भन्छन । कसरी मिल्न तयार हुनु।’– उनले भने,‘पटक पटक छलफल भनेर इलाका प्रहरी कार्यालयमा बोलाउने र दबाव दिने काम भईरहेको छ ।’ ‘प्रहरीले पनि हामीलाई नै हप्काउँछन् । उजुरी पनि दर्ता भएको छैन ।’ उनले भने –‘इलाका प्रहरी कार्यालयमा जाँदा उल्टै धम्क्याउने र डर देखाउने काम गर्छन ।’ इलाका प्रहरी कार्यालय कञ्चनपुरका डिएसपी दिपक रायले पिडितले निबेदन दिएको बताउँदै भने ‘निवेदन दिएकोले छलफल गर्न भनेका छौ तर जाहेरी आए कानुन अनुसार कारवाही गर्छौ ।’