कञ्चनपुर,असोज १ गते ।

कञ्चनरुप नगरपालिका–३ का १५ वर्षीय अरविन कुमार साह कोशी नदीमा आनन्द चतुर्दशी लागि जल भर्न गएका बेला पानीले बगाएर बेपत्ता भएका छन्। साथीहरूसँग राती करिब ११ बजे कोशी ब्यारेजमा नुहाउने क्रममा पानीको बहावले अरविनलाई बगाएको हो।

स्थानीय श्रवन दासका अनुसार, अरविनको खोजीका लागि गाउँका मानिसहरू कोशी नदीतिर पुगेका छन्। अरविनलाई बचाउन गएका शत्रुघन दासका छोरा, १५ वर्षीय ओमनारायण दास भने पानीमा डुब्नबाट जोगिए। उनलाई तत्कालै कञ्चनपुर नगर अस्पतालमा प्राथमिक उपचारपछि थप उपचारका लागि राजविराजस्थित गजेन्द्र नारायण सिंह अस्पताल पठाइएको छ। स्थानीयका अनुसार ओमनारायण चिसो र डरले बेहोस भएका थिए।

इलाका प्रहरी कार्यालय कञ्चनपुरका डिएसपी महेन्द्र नेपालका अनुसार, अरविनको खोजीका लागि सशस्त्र प्रहरी र नेपाल प्रहरीको संयुक्त टोली परिचालन गरिएको छ।