कञ्चनपुर, असोज २१ गते ।
सप्तरीको कञ्चनरुप नगरपालिका वार्ड नं १० स्थित बदगम्मामा विद्यालय जाने क्रममा एक विद्यार्थी गम्भीर दुर्घटनामा परेकी छन् । कञ्चनरुप १ की बबली साहलाई बा.प्र.०३–००१ ख. ०७९६ नम्बरको ट्रकले बिहान ६ः३० बजे पूर्व–पश्चिम महेन्द्र राजमार्गमा ठक्कर दिएको हो ।
दुर्घटनामा परी गम्भीर घाइते भएकी बबली साहलाई तुरुन्तै धर्मेश्वर अस्पतालमा लगिएको थियो, जहाँ उपचार सम्भव नभएपछि उनलाई थप उपचारका लागि बिराटनगर रेफर गरिएको छ ।
घटनाको विरोधमा आक्रोशित स्थानीयहरुले केही समय महेन्द्र राजमार्ग अवरुद्ध गरेका थिए, जसका कारण यातायात अवरुद्ध भएको थियो । स्थानीयले ट्रकचालकलाई कडा कारबाहीको माग गरिरहेका छन् भने प्रहरीले घटनाको थप अनुसन्धान गरिरहेको छ ।
त्यसतै सप्तकोसी नगरपालिका वडा नं १० भग्नी चोकमा आज बिहान ८:४५ बजे गाईघाटबाट विराटनगर जाँदै गरेको बस र कञ्चनपुरबाट बेल्टार जाँदै गरेको मोटरसाइकल एक आपसमा ठोक्किँदा मोटरसाइकलमा सवार दुई जना सख्त घाइते भएका छन्। उनीहरूलाई थप उपचारका लागि विराटनगर लगिएको छ।