कञ्चनपुर, कार्तिक १० गते । "महिला रोजगारको सृजना नगरी गरिबी निवारण असम्भव रहेको बताउँदै जनता समाजवादी पार्टीका नेता तथा कञ्चनरुप नगरपालिकाका मेयर प्रत्यासी भोला पासवानले विपन्न, भूमिहीन, र साना किसानहरूको उत्थानलाई आफ्नो प्रमुख एजेन्डा बनाउने प्रतिज्ञा गरेका छन्। "  

जनता समाजवादी पार्टी (जसपा) कञ्चनरुप नगर समितिले शनिबार कञ्चनपुरमा तिहार, छठ, र समाचकेवा पर्वको अवसरमा शुभकामना आदानप्रदान कार्यक्रममा पासवानले प्रतिज्ञा गरेका हुन् ।  यस कार्यक्रममा मेयर पदका उम्मेदवार एवं जसपा नेता भोला पासवानले सम्बोधन गर्दै नगरका किसान, भूमिहीन, र साना कृषकहरूको समस्या, बेरोजगारी, तथा महिला रोजगारीको अभाव जस्ता मुद्दाहरूमा पार्टीको अडान र आगामी योजना बारे जानकारी गराए।

पासवानले बाढीले तीन पटकसम्म लगाएको धानबालीमा पुर्‍याएको क्षतिका बारेमा चर्चा गर्दै, “किसानहरूले ठूलो घाटा बेहोरे तापनि अझै कुनै सहयोग प्राप्त भएको छैन,” भने। उनले भूमिहीन तथा साना किसानहरूलाई सहयोग नगरिएको र महिला रोजगारीका क्षेत्रमा प्रयास नगरी गरिबी निवारण असम्भव रहेको तर्क गरे। उनका अनुसार, "कञ्चनरुप नगरका ५१ प्रतिशत महिला कृषि कर्ममा संलग्न छन् तर सिजन बाहेक उनीहरू बेरोजगार हुँदा गरिबी हट्न कठिन छ। महिलाहरूलाई रोजगारी सिर्जना नगरिसम्म गरिबी घट्दैन।"

पासवानले राजनीति प्रवेशको उद्देश्य जनताको समृद्धि, गरिबी निवारण, सिमान्तकृत कृषकहरूको समस्या समाधान, र शिक्षाको गुणस्तरमा सुधार गर्नु रहेको बताए।

उनले थपे, “जसपा विपन्न, गरिब, सिमान्तकृत समुदायको उत्थान, तथा आर्थिक, राजनीतिक, र सामाजिक पहुँच सुनिश्चित गर्न प्रतिवद्ध छ।” उनले मधेसी, महिला, युवा, आदिवासी जनजाति, र दलित समुदायहरूको समस्यामा पार्टीको गम्भीरता उल्लेख गर्दै यी समुदायहरूको हकहितको संरक्षणमा पार्टीको अग्रसरता रहने बताए।

जसपा नेताहरूको धारणा अनुसार, पार्टीले समाजमा गरिबी घटाउने, महिला तथा युवा रोजगारीको सृजना, र सिमान्तकृत समुदायहरूको समस्यामा ध्यान केन्द्रित गर्दै नगरलाई समृद्ध बनाउने प्रतिबद्धता व्यक्त गरेको छ।

कार्यक्रममा कञ्चनरुप नगरपालिका-९ का वडाध्यक्ष रामसुन्दर यादवले जातपातको राजनीति गर्ने सामन्तवादी सोचका व्यक्तिहरूले अघिल्लो चुनाव गुमाएको चर्चा गर्दै आगामी दिनमा अझ सशक्त भएर अघि बढ्ने प्रतिबद्धता व्यक्त गरे। आफूले बाल्यकालदेखि नै शोषण भोगेकाले गरिबी, विपन्नता र दुःखलाई नजिकबाट देखेको बताए। उनले भने, "जसले गरिबी, अभाव र दुःख भोगेका छन्, उनीहरू नै समाज परिवर्तनका लागि काम गर्छन्।"

नगरका दलित कार्यपालिका सदस्य शोभा पासवानले पनि विपन्न, गरिब तथा सिमान्तकृत समुदायको उत्थानका लागि पार्टीको प्रतिबद्धता दोहोर्‍याए। नेताहरूले जसपाको मुख्य एजेन्डा समानता र समृद्धि भएको भन्दै, कञ्चनरुप नगरका गरिब, विपन्न, र सिमान्तकृत समुदायको जीवनस्तर सुधार्नका लागि ठोस कदम चाल्ने आश्वासन व्यक्त गरे।

कार्यक्रममा जसपाका जिल्ला सदस्य तथा कञ्चनरुप-११ का पूर्व वडाअध्यक्ष मोहमद जिब्रिल, जसपाका नगर सदस्य पुष्कर गुप्ता, जीवक्ष सरदार, बकिल मिया, र समाजवादी महिला संघकी जिल्ला अध्यक्ष अनुराधा साह लगायतले पनि सम्बोधन गरेका थिए। उक्त कार्यक्रम जसपाका जिल्ला सदस्य चितरंजन यादवको अध्यक्षतामा सम्पन्न भएको थियो भने सञ्चालन पत्रकार किशोर पासवानले गरेका थिए।

कार्यक्रममा  कञ्चनरुपका १२ ओटै वडाका ३ सय ५० जनाभन्दा बढी अगुवाहरुको सहभागिता रहेको थियो ।