कञ्चनपुर,कार्तिक १३ गते । सप्तरी प्रहरीले दुई दिनको सक्रियतामा विभिन्न कानुनी मुद्दामा फरार रहेका २५ जना प्रतिवादीलाई पक्राउ गरेको छ। पक्राउ परेकाहरूमा चोरी, कुटपिट, शिक्षा सम्बन्धी मुद्दा, लेनदेन, तथा जलसाजी जस्ता विभिन्न अभियोगमा अदालतबाट सजाय पाएका तर लुकीछिपी बसिरहेका व्यक्तिहरू रहेका छन्।

जिल्ला प्रहरी कार्यालय सप्तरीका अनुसार, २०८१।०७।१२ गते विशेष अभियानअन्तर्गत खटिएको प्रहरी टोलीले जिल्ला अदालत सप्तरीबाट फरार अभियुक्तहरूलाई खोजतलास गर्दै नियन्त्रणमा लिएको हो। पक्राउ परेकामध्ये बिष्णुपुर गाउँपालिका वडा नं ७ का २६ वर्षीय जितेन्द्र कुमार मण्डललाई चोरी मुद्दामा पाँच दिन कैद र रु १५,५०० जरिवाना तोकिएको थियो। यसरी पक्राउ गरिएका २५ जना प्रतिवादीलाई अदालतमा पेश गरी कानुनी प्रक्रिया अगाडि बढाइएको जनाइएको छ।

प्रहरीले पक्राउ परेका प्रतिवादीहरूमध्ये कतिपयलाई कैद सजाय तोकिएको र अन्यलाई जरिवाना तिराउने व्यवस्था गर्ने जानकारी दिएको छ। जरिवानाको कुल रकम २९,६९३ रुपैयाँ ३३ पैसा रहेको पनि प्रहरी कार्यालयले जनाएको छ।

प्रहरीको यस अभियानलाई सप्तरीमा अपराध नियन्त्रणका लागि एक महत्वपूर्ण कदमका रूपमा हेरिएको छ। साथै, प्रहरी प्रशासनले आगामी दिनहरूमा अवैध गतिविधि र फरार अभियुक्तहरूलाई नियन्त्रण गर्न निरन्तर सक्रियता बढाउने प्रतिबद्धता व्यक्त गरेको छ।