कञ्चनपुर, मंसिर २ गते  ।
सप्तरीको कञ्चनरुप नगरपालिका–१ स्थित श्री लक्ष्मी नारायण माध्यमिक विद्यालय कक्षा ११ र १२ को पठनपाठन करिब सात महिनादेखि ठप्प रहेको छ ।
विद्यालयका अनुसार, कक्षा बन्द हुनुको मुख्य कारण विद्यार्थीहरूको अत्यन्त कम उपस्थिति र नियमित पठनपाठनको अभाव हो । विद्यालयका प्रधानाध्यापक चन्देश्वर मण्डलले भने, “विद्यार्थीहरूको उपस्थिति न्यून मात्रामा छ ।“
कक्षा ११ मा ३० जना विद्यार्थीले नाम दर्ता गराएका थिए, तर तीमध्ये २५ जना “स्लिपिङ कोर्स“ का विद्यार्थी हुन् । यस्ता विद्यार्थीले औपचारिक रूपमा नाम लेखाए पनि विद्यालयमा नियमित रूपमा उपस्थित हुँदैनन् । पढ्न आउने नियमित विद्यार्थी ५ जना मात्र भए पनि तिनीहरूको समेत उपस्थिति निरन्तर छैन ।
कक्षा १२ मा स्थिति झन् गम्भीर रहेको प्रधानाध्यापक मण्डलले जनाए । उनका अनुसार, १०० जना विद्यार्थीले नाम दर्ता गराएका भए पनि सबै “स्लिपिङ कोर्स“ मा छन्, र कुनै पनि विद्यार्थी नियमित रूपमा विद्यालयमा उपस्थित छैनन्  ।
विद्यालयका शिक्षक हिरु पौडेलका अनुसार, स्थानीय विद्यार्थीहरू एसईई उत्तीर्ण गरेपछि बजार क्षेत्र वा शहरी विद्यालयमा भर्ना हुने प्रवृत्ति बढेको छ । उनका अनुसार, दुर्गम क्षेत्रमा अवस्थित यस विद्यालयप्रति विद्यार्थीहरूको आकर्षण घट्दै गएको छ ।
उनले भने, “विद्यार्थीहरू सुविधा सम्पन्न विद्यालय र शहरको वातावरणमा पढ्न रुचाउँछन् । यसले गर्दा स्थानीय विद्यालयहरूको पठनपाठनमा नकारात्मक प्रभाव परेको छ ।“
पौडेलले “स्लिपिङ कोर्स“ मा नाम दर्ता गर्ने प्रवृत्तिले विद्यालयको शैक्षिक गुणस्तरमा प्रत्यक्ष असर परेको बताएका छन् । उनका अनुसार, यस्ता विद्यार्थीले केवल प्रमाणपत्र प्राप्त गर्न विद्यालयमा नाम लेखाउँछन्, तर पढाइप्रति गम्भीर छैनन् ।
विद्यालयमा पठनपाठन पुनःसंचालनका लागि विद्यार्थीको उपस्थिति बढाउने र “स्लिपिङ कोर्स“ जस्ता समस्या रोक्न स्थानीय निकाय र समुदायको पहल आवश्यक छ । यसले मात्रै विद्यालयको शैक्षिक वातावरण सुधार गर्न सकिने जनाइएको छ ।