कञ्चनपुर, पुस ११ गते।
सप्तरी जिल्लाको कञ्चनरुप नगरपालिका वडा नं. ८ स्थित कञ्चनपुर बजारमा रहेको मुकेश साहको न्यू महालक्ष्मी ज्वेलर्समा बुधबार राति करिब ४२ लाख रुपैयाँ बराबरको चोरी भएको छ।

चार जना व्यक्तिहरुको समूहले मुख छोपेर आएर सटरको ताल्चा फुटाएर ज्वेलर्सभित्र प्रवेश गरेको र करिब २१ किलो चाँदीका गहना, ६–७ तोला सुनका गहना, र नगद ४० हजार रुपैयाँ चोरी गरेको संचालक मुकेश स्वर्णकारले जानकारी दिएका छन्।

चोरीको घटना राति करिब ३ बजे भएको र सटर फुटाएर भित्र पसेको दृश्य सिसिटिभी क्यामेरामा कैद भएको छ। घटनाको अनुसन्धानका लागि इलाका प्रहरी कार्यालय कञ्चनपुरका प्रहरी निरीक्षक सुशान्त मिश्रको नेतृत्वमा प्रहरी टोलीले अनुसन्धान जारी राखेको छ।

संचालक मुकेश साहले चोरीको विषयमा लिखित जाहेरी दिने जानकारी दिएका छन्। प्रहरी टोलीले घटनास्थलमा स्थलगत निरीक्षण गरी मुचुल्का उठाएको छ। चोरीको घटना सार्वजनिक भएपछि स्थानीय व्यापारी, राजनीतिकर्मी, र सर्वसाधारणले चासो व्यक्त गरेका छन्।

कञ्चनरुप नगरपालिकाको व्यस्त बजारमा ज्वेलर्समा चोरी भएपछि स्थानीय व्यापारीहरु त्रसित भएका छन्। व्यापारीहरुले प्रहरीको गस्ती र शान्ति सुरक्षामा गम्भीर कमजोरी रहेको गुनासो गरेका छन्।

व्यापारीहरुको अनुसार, नगरपालिकाको बिच बजारमा यस्ता घटनाहरु दोहोरिन थालेका छन्, तर प्रहरीको गस्ती पर्याप्त छैन। कञ्चनरुप व्यापार संघका सचिव शशी साहका अनुसार, "नगरपालिकाले नगर प्रहरी भर्ना गरे पनि उनीहरु बजार क्षेत्रमा सक्रिय देखिँदैनन्। नेपाल प्रहरी पनि बजार र लोकमार्गमा गस्तीमा देखिदैन।"

इलाका प्रहरी कार्यालयले भने, दरबन्दीअनुसारको जनशक्ति अभावका कारण सबै क्षेत्रमा खोजेकै समयमा प्रहरी पुग्न नसकेको स्वीकार गरेको छ। तर, शान्ति सुरक्षाप्रति प्रहरी सजग रहेको जनाएको छ।

सचिव साहले पछिल्लो समय बजार क्षेत्रमा चोरीका घटना दोहोरिन थालेको भए पनि सम्बन्धित सरोकारवालाको ध्यान पर्याप्त रुपमा नपुगेको आरोप लगाएका छन्।
व्यापारीहरुले सुरक्षा व्यवस्थालाई प्रभावकारी बनाउन प्रहरी गस्तीलाई थप कडा बनाउनु पर्ने माग गरेका छन्।

यो घटना व्यापारी समुदायको लागि मात्र नभई कञ्चनरुप नगरपालिका भित्रको सुरक्षा अवस्थाको गम्भीरता झल्काउने छ। स्थानीय प्रशासन र नगरपालिकाले प्रभावकारी कदम चालेर सुरक्षा व्यवस्थालाई सुदृढ पार्नुपर्ने देखिन्छ।