कञ्चनपुर, माघ २४ गते । 
सप्तरीको कञ्चनरुप नगरपालिका–३, बरमझिया सुव्वाटोल स्थित शंकर माध्यमिक विद्यालयको रकम हिनामिना गरेको ठहर गर्दै विशेष अदालतले तत्कालीन प्रधानाध्यापक दिलीपकुमार गुप्तालाई १८ महिना कैदको सजाय सुनाएको छ । सोही मुद्दाका प्रतिवादी विद्यालयका मुखिया श्रवणकुमार चौधरी र शिक्षक हृदयराम चौधरीलाई भने अदालतले सफाइ दिएको छ । विशेष अदालतका अध्यक्ष टेकनारायण कुँवर तथा सदस्यहरू रामबहादुर थापा र रितेन्द्र थापाको इजलासले गुप्तालाई दोषी ठहर गरेको हो ।
गुप्ताले शौचालय निर्माणका लागि छुट्याइएको ६२ हजार रुपैयाँभन्दा बढी रकम दुरुपयोग गरेको देखिएको छ । त्यस्तै, पिसिएफ अनुदानबापत शिक्षकहरूको तलब कटौती गरी १ लाख ५० हजार रुपैयाँ व्यक्तिगत रूपमा राखेको पुष्टि भएको छ । छात्रवृत्तिबापतको ३ लाख १० हजार रुपैयाँ समेत हिनामिना गरेको तथ्य बाहिर आएको छ । साथै, पाठ्यपुस्तक खरिदका लागि छुट्याइएको १ लाख २६ हजार रुपैयाँभन्दा बढी रकमको बिल फेला नपरेको तथा नक्कली बिल पेश गरिएको प्रमाणित भएको छ ।
विद्यालयको खाताबाट ४८ लाख ३२ हजार रुपैयाँ निकालिएको र पछि पुनः खातामा राखिएको देखिए पनि सो कार्य गुप्ताको बदनियत रहेको ठहर गर्दै अदालतले उनलाई दोषी ठहर गरेको छ । भ्रष्टाचार गरेको पुष्टि भएपछि अदालतले गुप्तालाई १८ महिना कैद सजायसँगै बिगो असुलउपर समेत गराउने आदेश दिएको छ ।
गुप्ता आर्थिक वर्ष २०७१ देखि २०७४ सम्म प्रधानाध्यापक रहँदा आर्थिक अनियमितता गरेको ठहर अख्तियार दुरुपयोग अनुसन्धान आयोगले गरेको थियो । आयोगले यसै वर्ष असोज १५ गते विशेष अदालतमा मुद्दा दायर गरेको थियो । अदालतले प्रमाणका आधारमा दोषी देखिएपछि उनलाई सजायको फैसला सुनाएको हो ।