कञ्चनपुर, माघ २५ गते ।
कञ्चनरुप नगरपालिका वडा नं २ स्थित बरमझिमा रहेको सगरमाथा पब्लिक एकेडेमी स्कुलले आयोजना गरेको स्वास्थ्य शिविरबाट ३ सय भन्दा बढी विपन्न नागरिकले लाभ उठाए । विराट मेडिकल कलेज टिचिङ अस्पताल बिराटनगरले संचालन गरेको एक दिने स्वास्थ्य शिविरमा शुक्रवार विपन्न नागरिकहरूले निशुल्क स्वास्थ्य सेवा
 प्राप्त गरे । शिविरका प्रमुख सञ्चालक, वडा नं २ का शिक्षक राजकुमार पंडितका अनुसार, सगरमाथा पब्लिक एकेडेमीमा पहिलो पटक यति ठूलो स्तरमा स्वास्थ्य शिविर आयोजना गरिएको थियो, जसका कारण स्थानीय विपन्न नागरिकहरू विशेषगरी लाभान्वित भएका छन् । शिविरमा ३ सय ६४ जनाले चेकजाँच गराएका थिए, जसमा जेनरल फिजिसियनले २६४ जनाको, बाल विभागले १०४ जनाको, स्त्री रोग र पर्सुती महिलाले ९३ जनाको र एक्स–रे सेवाले ६५ जनाको उपचार गरेका थिए ।
पंडितले बताए अनुसार, औषधि लिनुपर्ने बिरामीलाई उपचारमा लाग्ने खर्चको ५० प्रतिशत छुटको व्यवस्था गरिएको थियो ।
 यस शिविरमा कञ्चनरुप नगरपालिकाका नगर प्रमुख ललन प्रसाद गुप्ता प्रमुख अतिथि थिए भने विशेष अतिथि स्वरुप कञ्चनरुप नगरपालिका २ का वार्ड अध्यक्ष मेहदी हुसेन शेख, वार्ड सदस्य कमल किशोर गुप्ता र इसुफ मंसुरी सहभागी भएका थिए । साथै, अस्पतालका प्रतिनिधिहरू कामेश्वर पंडित, जितेन्द्र कुमार मेहता, जय कुमार शाह, नगरपालिकाका स्वास्थ्य चौकी प्रमुख चन्द्र किशोर पंडित र वडा नं १ का स्वास्थ्य प्रमुख सूर्यनारायण पंडित लगायत वरिष्ठ चिकित्सकहरूको पनि उपस्थिति थियो ।
यस शिविरले बरमझिको स्थानीय समुदायमा स्वास्थ्य सेवाको पहुँचलाई सहज बनाएको र स्थानीय नागरिकहरूको जीवनस्तरमा सुधार ल्याउने कसम गर्न सफल भएको छ ।