राजविराज, माघ २६ गते  ।
सप्तरीको बोदे बरसाइन नगरपालिका–३ स्थित हुलाकी राजमार्गबाट तस्करी हुँदै गरेको सवा सात क्विन्टल गाँजा प्रहरीले बरामद गरेको छ । शनिबार बिहान करिब १ः३० बजे बिहुल पुलभन्दा १०० मिटर पूर्वतर्फ एक स्कार्पियोबाट झार्दै गरेको अवस्थामा प्रहरीले ७ क्विन्टल २६ किलो गाँजा बरामद गरेको हो ।
प्रहरी चौकी मौवहा मल्हनियाबाट खटिएको टोलीले प्र.१–०२–००२ च ५८३८ नम्बरको स्कार्पियो नियन्त्रणमा लिएको हो । प्रहरी सहायक निरीक्षक हेमन्त तामाङ नेतृत्वको टोलीले सो गाँजा बरामद गरेको प्रहरी स्रोतले जनाएको छ । शनिबार आयोजित पत्रकार सम्मेलनमा एसपी ढकेन्द्र खतिवडाले उक्त घटनाबारे जानकारी गराउँदै तस्करीमा संलग्न व्यक्तिहरूको खोजी भइरहेको बताए ।
प्रहरीका अनुसार गाँजा नियन्त्रणमा लिइरहँदा स्कार्पियोका चालक र अर्का एक जना अर्को स्कार्पियोमा चढेर फरार भएका छन् । प्रहरीको प्रारम्भिक अनुसन्धान अनुसार, तस्करहरूले अर्को गाडी तयारी अवस्थामा राखेर भाग्ने योजना बनाएका थिए । एसपी खतिवडाका अनुसार, “गस्तीमा खटिएका प्रहरीहरू सामान्य प्रक्रियामा सञ्चालन भइरहेकाले तस्करहरू भाग्न सफल भए । तर, उनीहरूको खोजी कार्य तीव्र पारिएको छ ।”
सप्तरी प्रहरीले यसअघि पनि गाँजा तस्करीमा संलग्न व्यक्तिहरूलाई पक्राउ गर्ने तथा ठूलो परिमाणमा लागुऔषध बरामद गर्ने सफलता प्राप्त गरिसकेको छ ।
पुस २७ गते, बलान बिहुल गाउँपालिका–१ कमलदाहबाट ६ क्विन्टल ७० किलो बेवारिसे गाँजा बरामद गरिएको थियो । त्यस्तै मंसिर ४ गते, राजगढ गाउँपालिका–४ बेल्ही चपेना क्षेत्रमा प्रहरीले टिपरसहित १७ क्विन्टल १७ किलो गाँजा नियन्त्रणमा लिएको थियो ।
प्रहरीले लागुऔषध तस्करी नियन्त्रणका लागि निगरानी थप कडा बनाउने तथा तस्करहरूलाई पक्राउ गर्न अभियान तीव्र बनाउने जनाएको छ ।