कञ्चनपुर, फागुन २ गते ।
सप्तरीको कञ्चनरुप नगरपालिका–१, बौरवामा आयोजित बाल प्रतियोगिता तथा वार्षिक शैक्षिक कार्यक्रममा मदरसा मुनेव्वरुल इस्लाम का विद्यार्थीहरूले उत्कृष्ट प्रदर्शन गरेका छन् । विभिन्न शैक्षिक तथा सांस्कृतिक प्रतियोगितामा सहभागी हुँदै विद्यार्थीहरूले आफ्नो प्रतिभा उजागर गर्दै प्रशंसनीय सफलता हासिल गरेका हुन् ।
कार्यक्रममा निबन्ध लेखन, हाजिरीजवाफ, चित्रकला, वक्तृत्वकला तथा अन्य शैक्षिक गतिविधिहरू समावेश गरिएका थिए । ती प्रतिस्पर्धाहरूमा विद्यार्थीहरूले उत्साहपूर्वक भाग लिँदै आफ्नो ज्ञान, सृजनात्मकता, र दक्षता प्रस्तुत गरे । प्रतियोगितामा उत्कृष्ट प्रदर्शन गर्ने विद्यार्थीहरूलाई पुरस्कार तथा प्रमाणपत्र प्रदान गरिएको थियो ।
विद्यार्थीहरूको मेहनत र उपलब्धिलाई सम्मान गर्दै स्थानीय समाजसेवी तथा सामाजिक अभियन्ताहरूले विजयी विद्यार्थीहरूलाई विशेष सम्मान प्रदान गरे । पुरस्कार ग्रहण गर्दै विद्यार्थीहरूले आगामी दिनमा अझ परिश्रम गरेर समाजको गौरव बढाउने प्रतिबद्धता व्यक्त गरे ।
समारोहमा विद्यालय व्यवस्थापन समिति, शिक्षक, अभिभावक तथा स्थानीय अगुवाहरूको उल्लेखनीय उपस्थिति रहेको थियो । अतिथिहरूले विद्यालयको प्रयासको प्रशंसा गर्दै यस्ता कार्यक्रमहरूले बालबालिकाको बौद्धिक तथा सिर्जनात्मक क्षमताको विकास गर्न ठूलो टेवा पु¥याउने बताएका छन् ।
विद्यालय प्रशासनले पनि विद्यार्थीहरूलाई निरन्तर प्रोत्साहन गर्दै शैक्षिक गुणस्तर अभिवृद्धि गर्ने प्रतिबद्धता व्यक्त गरेको छ । आगामी दिनहरूमा अझ प्रभावकारी कार्यक्रमहरू सञ्चालन गर्दै बालबालिकाको प्रतिभा निखार्ने योजना रहेको विद्यालयका प्रतिनिधिले जानकारी गराएका छन् ।