कञ्चनपुर, फागुन १० गते ।
मिटरब्याजको शोषण अन्त्य तथा किसान–मजदुरहरूका हकहितको रक्षा गर्न कञ्चनरुप नगरपालिकामा मिटरब्याज विरुद्ध किसान मजदुर आन्दोलन नेपाल नगर कमिटी गठन गरिएको छ । उक्त नगर कमिटी कञ्चनरुप नगरपालिका–३, बरमझियास्थित आधारभूत विद्यालयमा शनिबार सम्पन्न भेलाले चयन गरेको हो ।
कार्यक्रममा किसान, मजदुर तथा सामाजिक अभियन्ताहरूको उल्लेखनीय सहभागिता रहेको थियो । आयोजकहरूका अनुसार मिटरब्याजका कारण किसानहरू आर्थिक शोषणमा परेका छन्, जसका विरुद्ध संगठित संघर्ष आवश्यक छ ।
कार्यक्रममा मिटरब्याज विरुद्ध किसान मजदुर आन्दोलन नेपाल जिल्ला समिति, सप्तरी का प्रतिनिधिहरूले मिटरब्याजको मारमा परेका किसान र मजदुरहरूको अवस्थाबारे चर्चा गर्दै यसको अन्त्यका लागि कानुनी तथा सामाजिक संघर्ष आवश्यक रहेको बताए । उनीहरूका अनुसार मिटरब्याजको प्रभावले किसानहरू आफ्नो जग्गा गुमाउनुका साथै चरम आर्थिक शोषणमा परेका छन् ।
समितिका एकजना प्रतिनिधिले भने, “मिटरब्याजको कारण गाउँका किसानहरू ऋणमा डुबिरहेका छन् । यस्ता असमान आर्थिक शोषण रोक्न संगठनात्मक आन्दोलन गर्नुपर्ने देखिन्छ ।”
नगर कमिटीले किसान तथा मजदुरहरूलाई कानुनी र सामाजिक चेतना अभिवृद्धि गराउँदै संघर्षको बाटो अवलम्बन गर्ने प्रतिबद्धता जनाएको छ ।
नगर कमिटी गठन कार्यक्रममा सर्वसम्मत रूपमा निम्न पदाधिकारीहरू चयन गरिएका छन्ः
अध्यक्षः मोहम्मद ताहिर, उपाध्यक्षः बिरेन्द्र कुमार मण्डल, सचिवः जुगल कुमार चौधरी, सह–सचिवः अमित कुमार पासवान, कोषाध्यक्षः कोसिला देवी राम, स्थानीय सचिवालय सदस्यहरूः नैन कुमार सदा, विजय कुमार चौधरी, राजदेव सदा, दसरथ शाह, संझा देवी सरदार, दीप नारायण शाह सदस्यहरूः नर्सिङ देव कुमार, राजकुमारी चौधरी, शान्ति देवी चौधरी, राधाकान्त चौधरी
नगर कमिटी गठन कार्यक्रममा विभिन्न विशिष्ट व्यक्तिहरूको उपस्थिति रहेको थियो । कार्यक्रममा मिटरब्याज आन्दोलनका केन्द्रीय सचिवालय सदस्य छेदी पासवान, केन्द्रीय सचिवालय सदस्य बिरेन्द्र कुमार सिंह, मिथिला कमान्ड सह–इन्चार्ज सूर्यनारायण मण्डल, अग्निसाइर कृष्ण गाउँपालिकाका अध्यक्ष दिपेन्द्र लेखी, जिल्ला सल्लाहकार शिवचन्द्र यादव, डा. ललन चौधरी, कार्यक्रम सञ्चालक विजय कुमार चौधरी, केन्द्रीय सदस्य मोहम्मद इस्लाम, जिल्ला कार्यलय सचिव श्रीलाल मण्डल तथा अन्य राजनीतिक एवं सामाजिक अभियन्ताहरूको उपस्थिति थियो ।
नयाँ गठन भएको नगर कमिटीले मिटरब्याज पीडितहरूको हकहितका लागि विभिन्न योजनाहरू अगाडि सारेको छ । किसान तथा मजदुरहरूलाई मिटरब्याज सम्बन्धी कानुनी तथा आर्थिक ज्ञान दिन सचेतनामूलक कार्यक्रम सञ्चालन गर्ने, पीडितहरूका समस्या समाधान गर्न कानुनी प्रक्रिया अगाडि बढाउने, अन्य किसान तथा मजदुर संगठनहरूसँग समन्वय गर्दै शोषणविरुद्ध दबाबमूलक कार्यक्रम सञ्चालन गर्ने तथा ऋणमा डुबेका किसानहरूलाई सरकारी तथा गैरसरकारी सहयोग दिलाउने पहल गर्ने योजनाहरू बनाइएको छ ।
कार्यक्रमका अन्त्यमा सहभागीहरूले मिटरब्याज जस्तो आर्थिक शोषण अन्त्य गर्न अझ सशक्त र निरन्तर संघर्ष गर्नुपर्नेमा जोड दिएका थिए ।