राजविराज, फागुन १६ गते ।
नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आफ्नो पार्टीलाई नै सक्कली मधेशवादी शक्ति भएको दाबी गरेका छन्। सप्तरीको राजविराजमा आयोजित ‘जनतासँग माओवादी, तराई-मधेश जागरण अभियान’ अन्तर्गत आयोजित अन्तरक्रियामा उनले मधेशवादी भनिएका दलहरूको गतिविधि मधेशको हितमा नरहेको आरोप लगाए।
उनले मधेश आन्दोलनको पृष्ठभूमि माओवादी जनयुद्धले तयार पारेको दाबी गर्दै, मधेशवादी दलहरू बिस्तारै कमजोर हुँदै गएको बताए। साथै, जनतासँग गरेको प्रतिबद्धता पूरा गर्न नसकेको भन्दै तिनको औचित्य समाप्त हुँदै गएको तर्क गरे।
दाहालले गणतन्त्र स्थापनापछि पहिलो राष्ट्रपतिका रूपमा रामराजा प्रसाद सिंहलाई माओवादीले अघि सारेको स्मरण गर्दै, मधेशवादी दलहरूले नै उनलाई राष्ट्रपति बन्नबाट रोक्न भूमिका खेलेको आरोप लगाए। “हामीले सिंहलाई पहिलो राष्ट्रपति बनाउन चाह्यौं, तर आफैंलाई मधेशका ठूला नेता ठान्नेहरूले उनलाई रोकिदिए,” उनले भने।
उनले माओवादी र मधेशवादी शक्तिहरू मिलेर अघि बढ्नुपर्नेमा जोड दिदै, "माओवादीले हिजो बलिदान दिएर स्थापित गरेको मधेशी पहिचान र अधिकारको रक्षा हामीले नै गर्नुपर्छ" भन्दै यो अभियान अघि बढाइएको स्पष्ट गरे।
माओवादीका वरिष्ठ उपाध्यक्ष नारायणकाजी श्रेष्ठले वर्तमान सरकार निरंकुश बन्दै गएको आरोप लगाए। उनले सरकार सामाजिक सञ्जाल नियन्त्रण विधेयक ल्याएर नागरिकहरूको अभिव्यक्ति स्वतन्त्रता दबाउन खोजिरहेको बताए।
त्यस्तै, नेपाल समाजवादी पार्टी (नेसपा) का अध्यक्ष महेन्द्र राय यादवले संघीयताको रक्षा मधेशवादी दलहरूमार्फत सम्भव नरहेको तर्क गर्दै माओवादीले नै मधेशका मुद्दा उठाउन सक्ने बताए।
प्रतिक्रिया