कञ्चनपुर, फागुन १६ गते ।

सप्तरीको कञ्चनरुप नगरपालिकाका मेयर पदका प्रत्यासी भोला पासवानले आगलागीबाट पीडित परिवार, विपन्न परिवारका छोरीको विवाह तथा महिला हिंसा पीडित किशोरीलाई राहत सहयोग गरेका छन्। समाजसेवामा निरन्तर सक्रिय पासवानले यसअघि पनि कोभिड–१९ महामारीका समयमा स्थानीय समुदायलाई खाद्यान्न, स्वास्थ्य सामग्री तथा अन्य आवश्यक सहयोग उपलब्ध गराएका थिए।

कञ्चनरुप नगरपालिका–६, जमुवामा आगलागी पीडित बचकुन सरदारको दुई कोठे घर पूर्ण रूपमा नष्ट भएपछि पासवानले चामल, सिरक, त्रिपाल, मुरही र लत्ताकपडा हस्तान्तरण गरे। त्यस्तै, सोही वडाका जोगेन्द्र रामकी छोरीको विवाहका लागि पनि आवश्यक सामग्री प्रदान गरेका छन्।

यस्तै, कञ्चनरुप–४ का दशरथ यादवको घर आगलागीबाट ध्वस्त भएपछि पासवानले खाद्यान्न र आवश्यक राहत सामग्री सहयोग गरेका हुन्। साथै, उनले यौन हिंसाबाट पीडित एक किशोरीलाई पनि राहत उपलब्ध गराउँदै पीडितहरूको पुनःस्थापनाका लागि निरन्तर सहयोग गर्ने प्रतिबद्धता जनाए।

कोभिड–१९ महामारीको कठिन समयमा पासवानले कञ्चनरुप नगरपालिकाका विपन्न परिवारलाई खाद्यान्न, स्यानिटाइजर, मास्क, औषधि, अक्सिजन सिलिन्डर लगायतका सामग्री निःशुल्क वितरण गरेका थिए। लकडाउनका कारण समस्यामा परेका दैनिक ज्याला मजदुरी गर्ने वर्गलाई उनले व्यक्तिगत पहलमा राहत उपलब्ध गराएका थिए।

पासवानले समाजसेवाका विभिन्न क्षेत्रमा सक्रिय भूमिका निर्वाह गर्दै आएका छन्। विपन्न, दलित, मजदुर तथा पीडित वर्गका समस्यामा उनले निरन्तर चासो देखाउँदै आएका छन्। स्थानीय समस्याहरूको समाधानका लागि पहल गर्ने र पीडित परिवारलाई तत्काल सहयोग उपलब्ध गराउने उनको प्रतिबद्धता यस राहत वितरण कार्यक्रममा पनि झल्किएको थियो।

राहत वितरण कार्यक्रममा समाजसेवी रामदेव खङ्ग, कञ्चनरुप व्यापार संघका सचिव शशी साह, कञ्चनरुप ४का यूवा ब्यापारी सचिन साह,युवा समाजसेवी गजेन्द्र सिंह (बजरङ्ग), कार्यपालिका सदस्य शोभा पासवान, जसपा वडा नं. ६ का संयोजक मुखीलाल चौधरी, वडा नं. ५ का बसन्त सरदार लगायतको उपस्थिति रहेको थियो।