सिरहा, फागुन २३ गते ।

 सिरहाको नवराजपुर गाउँपालिका–१ भगवतीपुरकी १७ वर्षीया रिंकु सदायको मृत्यु प्रकरणमा संलग्न थप चार जनालाई प्रहरीले पक्राउ गरेको छ। बलात्कार घटना दबाउन गाउँमै पञ्चायत बस्ने वडा सदस्यसहित चार जनालाई नियन्त्रणमा लिइएको सिरहा प्रहरीका प्रवक्ता डिएसपी वीरेन्द्र पासवानले जानकारी दिए। पक्राउ पर्नेहरूमा वडा सदस्य नथुनी साह, राम कृपाल मण्डल, विन्देश्वर साह र नाम नखुलेका एक व्यक्ति रहेका छन्।

गत माघ २७ गते राति शौच गर्न बाहिर निस्किएकी रिंकुलाई तीन जनाले अपहरण गरी सामूहिक बलात्कार गरेका थिए। घटनालाई ढाकछोप गर्न वडा सदस्यसहित केही व्यक्तिहरूले गाउँमै पञ्चायत बोलाई पीडित परिवारलाई दबाब दिएका थिए। तर, पञ्चायत बसेको केही घण्टामै माघ ३० गते रिंकु आफ्नै घरमा मृत अवस्थामा फेला परेकी थिइन्।

घटनापछि इलाका प्रहरी कार्यालयले सुरुवातमा बलात्कार आरोपी तीन जनामाथि आत्महत्या दुरुत्साहन मुद्दामा अनुसन्धान अघि बढाएको थियो। तर, सामूहिक बलात्कारको तथ्य बाहिर आएपछि पीडित परिवारले बलात्कारमा संलग्न तीन जना र पञ्चायतमा घटना दबाउन भूमिका खेलेका पाँच जना गरी आठ जनाविरुद्ध जबरजस्ती करणी, अपहरण, हत्या र लेनदेन मुद्दामा जाहेरी दिएका छन्।

बलात्कारका मुख्य आरोपी रुपेश मण्डल यसअघि नै पक्राउ परिसकेका छन्, भने अन्य तीन जना अझै फरार रहेको प्रहरीले जनाएको छ। प्रहरीले पक्राउ परेकाहरूमाथि आवश्यक अनुसन्धान अघि बढाएको छ भने फरार अभियुक्तहरूको खोजी कार्य तीव्र पारिएको जनाएको छ।