कञ्चनपुर, चैत्र ९ गते ।
कञ्चनरुप नगरपालिका–१ का वडा अध्यक्ष रब्बान खानले गाउँघरका मानिसहरूलाई आम्दानीभन्दा बढी खर्च नगर्न र वित्तीय साक्षरतामा जोड दिन आग्रह गरेका छन् । शनिबार कञ्चनरुप–१, बैरवामा आयोजित वित्तीय साक्षरता तथा स्वास्थ्य सचेतना कार्यक्रममा बोल्दै अध्यक्ष खानले यस्तो सुझाव दिनुभएको हो ।
छेदी पंजियार धर्मशालामा सहयोगी बचत तथा ऋण सहकारी संस्था लिमिटेडको आयोजनामा सम्पन्न उक्त कार्यक्रममा अध्यक्ष खानले वर्तमान समयको आवश्यकता वित्तीय अनुशासन र स्वास्थ्य सचेतना भएको उल्लेख गर्नुभयो । उहाँले भन्नुभयो, “हाम्रो गाउँघरका धेरै युवा विदेशमा छन्, कतिपय जागिरमा छन् । तर, आम्दानीभन्दा खर्च बढी हुन नदिनु सबैका लागि महत्वपूर्ण छ ।”
कार्यक्रममा वडा अध्यक्ष खानले एन्जल फाउन्डेसन, लहान शाखालाई यस्ता जनचेतनामूलक कार्यक्रम सञ्चालन गरेकोमा धन्यवाद ज्ञापन गर्नुभएको थियो । साथै, स्वास्थ्य सचेतनाबारे बोल्दै उहाँले गोपनीय विषयमा लाज नमानी चिकित्सकसँग सल्लाह लिन सबैलाई आग्रह गर्नुभयो ।
कार्यक्रममा विशिष्ट अतिथिका रूपमा ओम प्रकाश कोइरालाको उपस्थिति रहेको थियो । सहयोगी बचत तथा ऋण सहकारी संस्था लिमिटेडका अध्यक्ष अनोज कुमार यादवको अध्यक्षतामा कार्यक्रम सञ्चालन भएको थियो ।
स्वास्थ्य र वित्तीय सचेतना सम्बन्धी जानकारी एन्जल फाउन्डेसनका प्रशिक्षक अनिशा गिरि र पुष्पा कामैतले दिनुभएको थियो । कार्यक्रममा सहकारीका व्यवस्थापक विनोद कुमार दास, संस्थाका कर्मचारी, स्थानीय राजनीतिकर्मी, तिरहुत गाउँपालिका र कञ्चनरुप नगरपालिकाका सेवाग्राही तथा सञ्चारकर्मीहरूको उपस्थिति रहेको थियो ।
कार्यक्रममा सहभागीहरूले आम्दानी व्यवस्थापन, बचत, लगानीका उपाय, ऋणको सदुपयोग, स्वास्थ्य, पोषण र प्राथमिक उपचारसम्बन्धी विविध जानकारी लिएको आयोजक संस्थाले जनाएको छ ।
सहयोगी बचत तथा ऋण सहकारी संस्था लिमिटेडले आगामी दिनहरूमा पनि यस्ता कार्यक्रमलाई निरन्तरता दिने प्रतिबद्धता जनाएको छ ।