कञ्चनरूप, चैत्र १४ गते ।

सप्तरीको कञ्चनरुप नगरपालिकामा ट्राफिक नियमको कडाइ गरिने भएको छ । इलाका प्रहरी कार्यालय कञ्चनपुरका डिएसपी माधव प्रसाद काफ्लेले पछिल्लो समय बढ्दै गइरहेको सवारी दुर्घटनालाई मध्यनजर गर्दै नियम उल्लंघन गर्नेहरूमाथि कडा निगरानी राख्ने बताएका छन् ।
डिएसपी काफ्लेका अनुसार मोटरसाइकल तथा स्कुटर चालकहरूले अनिवार्य रूपमा हेल्मेट लगाउनुपर्नेछ भने निर्धारित गति सीमाभन्दा बढी सवारी चलाउन पाइने छैन । मादक पदार्थ सेवन गरेर सवारी सञ्चालन गर्ने, अनावश्यक ओभरटेक गर्ने, ट्राफिक नियमको पालना नगर्ने जस्ता गतिविधि नियन्त्रण गर्न प्रहरीले विशेष अभियान सञ्चालन गर्ने जनाएको छ ।
सडक सुरक्षालाई थप प्रभावकारी बनाउन पैदल यात्रुहरूको सुरक्षाका लागि पनि विशेष उपायहरू अपनाइनेछ । विशेष गरी रातिको समयमा पैदल यात्रुले चम्किने वा टल्किने कपडा लगाउने सल्लाह दिइएको छ, जसले अन्य सवारी चालकलाई उनीहरू देख्न सजिलो हुनेछ ।
प्रहरीले ट्राफिक नियम उल्लंघन गर्ने जो–कोहीलाई कारबाही गर्ने चेतावनीसमेत दिएको छ । जरिवाना, सवारी अनुमति पत्र जफत लगायतका कानुनी प्रक्रिया अघि बढाइने जनाइएको छ । यसका साथै, इलाका प्रहरी कार्यालय कञ्चनपुरले सडक सुरक्षासम्बन्धी सचेतना अभियान सञ्चालन गर्दै ट्राफिक नियमको प्रभावकारी कार्यान्वयनका लागि अनुगमनलाई थप कडाइ गर्ने जनाएको छ ।
डिएसपी काफ्लेले आम नागरिकलाई ट्राफिक नियमको पालना गर्न, सुरक्षाका उपायहरू अपनाउन र सुरक्षित यात्राका लागि सचेत रहन अनुरोध गरेका छन् ।