कञ्चनपुर, चैत्र १४ गते ।
सप्तरी जिल्लाको सप्तकोशी नगरपालिका–५ गंगाजलीमा भीषण आगलागी हुँदा एक गाईगोठ पूर्ण रूपमा जलेर नष्ट भएको छ । आगलागीका कारण लाखौंको क्षति पुगेको छ भने घरधनी घाइते भएका छन् ।
स्थानीय सोम प्रसाद आचार्यको जस्ता र काठले बनेको एकतले गाईगोठमा चैत १३ गते राति करिब ११ बजे अचानक आगलागी भएको हो । रातिको समय भएकाले स्थानीयलाई तत्काल थाहा नपर्दा आगो तीव्र रूपमा फैलिएको बताइएको छ । आगलागीका कारण आचार्यको दुईतले जस्ताको छाना र काठले बनेको घरमा समेत आंशिक क्षति पुगेको छ ।
आगो निभाउने क्रममा घरधनी सोम प्रसाद आचार्य आफैं पनि घाइते भएका छन् । स्थानीय तथा सुरक्षाकर्मीको सहयोगमा उनलाई तत्काल स्वास्थ्य चौकी फत्तेपुरमा उपचारका लागि लगिएको थियो । चिकित्सकहरूका अनुसार उनको हात, खुट्टा तथा शरीरका केही भाग जलेका छन्, तर अवस्था सामान्य रहेको छ ।
यस आगलागीबाट पशुहरूमा पनि क्षति पुगेको छ । घटनामा आचार्यको एक भैँसीको पाडो र दुईवटा बाख्रा जलेर मरेका छन् । गोठ पूर्ण रूपमा ध्वस्त भएको र घरमा पनि क्षति पुगेको हुँदा प्रारम्भिक अनुमानअनुसार करिब १५ लाख रुपैयाँ बराबरको धनमाल नष्ट भएको बताइएको छ ।
घटनापछि कञ्चनरुप नगरपालिकाको दमकल, नेपाल प्रहरी, सशस्त्र प्रहरी बल तथा स्थानीय बासिन्दाको सक्रियतामा राति ११ः३५ बजे आगो पूर्ण रूपमा नियन्त्रणमा लिइएको थियो । आगलागीको कारण भने अझै खुलेको छैन । स्थानीय प्रशासनले घटनाबारे थप अनुसन्धान भइरहेको जनाएको छ ।