बारा, १४ चैत्र  । पूर्वमन्त्री विश्‍वेन्द्र पासवानले गणतन्त्रलाई संस्थागत गर्ने विषयमा जोड दिएका छन्। बाराको सदरमुकाम कलैयामा पत्रकारहरूसँग कुरा गर्दै पूर्वमन्त्री पासवानले संघीयता, गणतन्त्र, सामाजिक न्याय, समानता, र समावेशिताका मुद्दालाई प्राथमिकतामा राखेर सबै गणतन्त्रवादी शक्तिहरू एकताबद्ध हुनुपर्ने आवश्यकता औंल्याए।

"अब मुलुकमा कुनै तानाशाही व्यवस्था नेपाली जनताले स्वीकार गर्ने पक्षमा छैनन्," उनले भने। गणतन्त्रको विरोधमा पूर्वराजा ज्ञानेन्द्र शाह र उनका समर्थकहरूले गरिरहेको भ्रामक प्रचारप्रति कटाक्ष गर्दै उनले भने, "श्रीमान, श्रीमती र छिमेकीसँग एक घन्टा बोलचाल नभएको आधारमा सम्बन्ध टुट्दैन। यो मानवीय प्राकृतिक सत्य हो। त्यसैले झूटा प्रचार नगर्नु नै उचित हुन्छ।"

नेपालको परिवर्तन स्वयम् नेपाली जनताले नै गर्ने इतिहास रहेको उल्लेख गर्दै पूर्वमन्त्री पासवानले नेपालको संविधान र गणतन्त्रको विपक्षमा विदेशी शक्तिहरूले कुनै पनि प्रकारको हस्तक्षेप नगर्न चेतावनी दिए।

जनताको निराशालाई आशामा बदल्न, मुलुकको मुहार फेर्ने, शान्ति-सुरक्षा कायम गर्ने, र विधिको शासनलाई कार्यान्वयन गर्ने उद्देश्यले गणतन्त्रवादी शक्तिहरू एकजुट हुनुपर्ने आजको आवश्यकता रहेको उनले बताए।

पूर्वमन्त्री पासवानले दलित समुदायमाथि हुने जातीय छुवाछूत र विभेदको अन्त्य गर्न सरकारलाई आग्रह गरे। उनले राज्य र गैर-राज्यका तर्फबाट हुने सबै प्रकारका विभेद समाप्त गर्न स्पष्ट माग प्रस्तुत गरे।

पूर्वराजा ज्ञानेन्द्र शाहप्रति टिप्पणी

फरक प्रसंगमा पूर्वमन्त्री पासवानले पूर्वराजा ज्ञानेन्द्र शाहले सामाजिक सञ्जालमार्फत राजतन्त्रको समर्थनमा चैत्र १५ गतेका लागि गरेको आव्हानप्रति आपत्ति जनाए। उनले प्रश्न गरे, "के नेपाल कसैले खाइदिएको छ? उत्तर, दक्षिण, पूर्व वा पश्चिमबाट कसैले नेपाल कब्जा गरेको छ र? यस्तो भ्रम फैलाएर देश बचाउने कुरा गर्दा तपाईंलाई निर्लज्ज, क्रूर, भ्रष्ट पूर्वशासक भन्दैनन्? समयमा नै चेतना भया।"

नेता र दलहरूप्रति जनतामा निराशा बढ्दै गए पनि गणतन्त्रको कुनै विकल्प नरहेको पूर्वमन्त्री पासवानले बताए।