राजविराज, चैत्र १६ गते ।

राजावादीको हिंसात्मक प्रदर्शनका क्रममा पत्रकारको मृत्यु र सञ्चारगृहमा भएको आक्रमणको विरोधमा शनिबार राजविराजमा प्रदर्शन गरिएको छ। नेपाल पत्रकार महासंघ, सप्तरीको नेतृत्वमा विभिन्न सञ्चारमाध्यममा कार्यरत पत्रकारहरूले विरोध प्रदर्शन गरेका हुन्।

प्रदर्शनकारीहरूले 'पत्रकारको हत्यारालाई कारबाही गर', 'प्रेस स्वतन्त्रता कायम गर', 'अराजकताको अन्त्य गर' जस्ता नारा लेखिएका प्लेकार्ड बोकेर नगर परिक्रमा गरेका थिए।

प्रदर्शनपछि नेता चोकमा आयोजित कोणसभामा महासंघ सप्तरी शाखाका अध्यक्ष श्रवणकुमार देवले दिवंगत पत्रकार सुरेश रजकप्रति श्रद्धाञ्जली अर्पण गर्दै पत्रकारको पेसागत सुरक्षाको ग्यारेन्टीको माग गरे। उनले प्रेस स्वतन्त्रता र पत्रकारको जीवनरक्षाका लागि सरकारलाई तत्काल कदम चाल्न आग्रह गरे।

शुक्रबार राजधानी काठमाडौंको तीनकुनेस्थित भवनमा राजावादीको प्रदर्शनका क्रममा आगजनी हुँदा एभिन्यूज टेलिभिजनमा कार्यरत पत्रकार सुरेश रजकको मृत्यु भएको थियो। प्रदर्शनकारीहरूले कान्तिपुर टेलिभिजनलगायतका सञ्चारगृहमा आक्रमण गरेका थिए, जसले सञ्चार माध्यमको सुरक्षामा गम्भीर खतरा उत्पन्न गराएको छ।

पत्रकार महासंघका पदाधिकारीहरूले प्रेस स्वतन्त्रतामाथिको आक्रमण सह्य नहुने चेतावनी दिँदै दोषीलाई अविलम्ब कानुनी कारबाही गर्न माग गरेका छन्। यसअघि पनि प्रेस स्वतन्त्रता कुण्ठित गर्ने विभिन्न घटना भइरहेका भन्दै पत्रकारहरूले आफ्नो पेसागत सुरक्षाका लागि थप संघर्ष गर्ने बताएका छन्।