काठमाडौं, चैत्र १६ गते । 
काठमाडौं महानगरपालिकाले पूर्वराजा ज्ञानेन्द्र शाहलाई ७ लाख ९३ हजार रुपैयाँ जरिवाना तोकेको छ । कोटेश्वर क्षेत्रको सडक तथा सडकपेटीमा जथाभावी फोहोर फालिएको आरोपमा महानगरपालिकाले यो कारबाही अघि बढाएको हो ।
फोहरमैला व्यवस्थापन ऐन, २०६८, काठमाडौं महानगरपालिका वातावरण तथा प्राकृतिक स्रोत संरक्षण ऐन, २०७७, तथा आर्थिक ऐन, २०८१ अनुसार शाहलाई उक्त रकम जरिवाना तोकिएको महानगरपालिकाले जनाएको छ । सार्वजनिक स्थानमा फोहोर फाल्ने कार्यविरुद्ध निगरानी बढाइरहेको महानगरपालिकाले यसअघि पनि विभिन्न व्यवसायिक प्रतिष्ठान तथा व्यक्तिहरूलाई जरिवाना गरेको थियो । तर, फोहोरमैला व्यवस्थापनमा अझ कडाइ गर्नुपर्ने देखिएकाले आवश्यक कारबाही गरिएको बताइएको छ ।
महानगरपालिकाका अनुसार मुख्य चोक, सडक तथा सडकपेटीहरूमा गरिएको अनुगमनका क्रममा नियम उल्लंघन गर्नेहरू पहिचान गरिएपछि कारबाही गरिएको हो । यसैबीच, प्रशासन विभाग, काठमाडौं महानगरपालिकाले निजी सम्पत्तिको क्षतिपूर्ति स्थानीय सरकारको क्षेत्राधिकारभित्र नपर्ने स्पष्ट गरेको छ ।
सार्वजनिक स्थानमा फोहोर व्यवस्थापनलाई प्रभावकारी बनाउन महानगरपालिकाले निरन्तर अनुगमन गर्ने जनाएको छ । साथै, फोहोर फाल्ने जोसुकैलाई कारबाही गरिने भन्दै सचेत रहन महानगरपालिकाले आग्रह गरेको छ ।