कञ्चनपुर, चैत्र १८ गते ।
इस्लाम धर्मावलम्बीहरूले भोलि सोमबार इद–उल–फित्र (इद) मनाउँदै छन् । आइतबार साँझ चन्द्रमा देखिएकाले मुस्लिम समुदायले इद–उल–फित्र मनाउन तयारी गरिरहेका छन् । खाडी मुलुक साउदी अरब, कतार लगायतका देशहरूमा आइतबार नै इद मनाए पनि नेपालसहित भारत, पाकिस्तान, बंगलादेश लगायतका मुलुकहरूमा सोमबार मुस्लिम समुदायले एकैसाथ इद मनाउनेछन् ।
इस्लाम धर्मका पाँच आधार स्तम्भ – इमान, नवाज, रोजा, जकात र हज – मध्ये रोजा तेस्रो महत्त्वपूर्ण आधार हो । मुस्लिम समुदायमा हरेक बालिग महिला र पुरुष रमजान महिनामा रोजा बस्न अनिवार्य प्रावधान रहेको छ ।
इदको दिन विशेष परिकारहरू तयार गर्ने परम्परा रहेको छ । यस्ता परिकारमा खीर र अन्य मिठाइयाँ तयार गरिन्छ । साथै, परिवारका सदस्यहरूको लागि नयाँ कपडा पनि खरिद गर्ने प्रचलन रहेको छ । जनकपुरधाम उपमहानगरपालिकाका पूर्वउपमेयर असगर अलीका अनुसार, इदको नमाज पढ्नुअघि घरका प्रत्येक सदस्यलाई नयाँ कपडामा सज्जित गर्न जरुरी हुन्छ ।
“गरीब र असहायलाई जकातको रूपमा लत्ताकपडा र खानेकुराको सहयोग गर्ने परिपाटी छ,” उनले भने ।
इदको बिहान, सम्पूर्ण मुस्लिमहरू नुहाई सफा भइ नयाँ कपडामा इदगाह वा मस्जिदमा नमाज पढ्न जान्छन् । नमाज अघिल्लो दिनको रोजा शुद्धीकरणका लागि फित्रराको रूपमा २ किलो ४५ ग्राम गहुँ दान गर्ने प्रावधान पनि रहेको छ ।
इदको नमाज पछि, मुस्लिम समुदायले एक अर्कालाई “इद मुबारक“ भन्ने शुभकामना सन्देश दिएर पर्व मनाउने परिपाटी रहेको छ । यस अवसरमा संघीय सरकार र मधेश प्रदेश सरकारले सोमबार सार्वजनिक बिदा दिइसकेको छ ।