राजविराज, चैत्र १८ गते ।
नेपाल पत्रकार महासंघ सप्तरीले पत्रकार सुरेश रजकको हत्या प्रकरणमा दोषीलाई कानूनी कारबाही गर्न माग गर्दै सरकारलाई ध्यानाकर्षण पत्र बुझाएको छ । महासंघले सोमबार जिल्ला प्रशासन कार्यालय सप्तरीमार्फत प्रधानमन्त्री तथा मन्त्रीपरिषद्को कार्यालयलाई पत्र हस्तान्तरण गर्दै घटनाको निष्पक्ष छानबिन गरी दोषीलाई कडा सजाय दिन आग्रह गरेको हो ।
महासंघका अध्यक्ष श्रवण कुमार देवको नेतृत्वमा बुझाइएको ध्यानाकर्षण पत्रमा पत्रकार रजकको हत्या तथा सञ्चारमाध्यममाथि भएको आक्रमणप्रति गम्भीर आपत्ति जनाइएको छ । महासंघले पत्रकार तथा सञ्चारकर्मीमाथि भइरहेका हिंसात्मक आक्रमणहरू रोक्न सरकारलाई तत्काल प्रभावकारी कदम चाल्न अनुरोध गरेको छ ।
ध्यानाकर्षण पत्र बुझ्दै प्रमुख जिल्ला अधिकारी भोला दाहालले घटनालाई गम्भीर रूपमा लिँदै आवश्यक कानूनी प्रक्रिया अघि बढाइने प्रतिबद्धता जनाएका छन् ।
घटनाको विवरण
गत शुक्रबार काठमाडौंमा समाचार संकलन गर्ने क्रममा एभिन्यूज टेलिभिजनका पत्रकार शुरेश रजकमाथि आक्रमण भएको थियो । आन्दोलनकारीहरूले उनलाई घरभित्र थुनेर आगो लगाई हत्या गरेका थिए । घटनापछि नेपाल पत्रकार महासंघले देशभर विरोधका कार्यक्रम सञ्चालन गर्दै आएको छ ।
महासंघले हत्यारालाई कानूनी कारबाही गर्न, पीडित परिवारलाई क्षतिपूर्ति उपलब्ध गराउन तथा सञ्चार गृहलाई आवश्यक सहयोग गर्न सरकारलाई आग्रह गरेको छ । साथै, महासंघले पत्रकारहरूको सुरक्षाका लागि प्रभावकारी व्यवस्था मिलाउन माग गरेको छ ।
यसअघि महासंघले शनिबार राजविराजमा विरोध ¥याली निकालेको थियो भने आइतबार पत्रकारहरूले कालोपट्टी बाँधेर प्रदर्शन गरेका थिए । महासंघले एक हप्ताभित्र माग पूरा नभए चरणबद्ध आन्दोलन गर्ने चेतावनी दिएको छ ।