कञ्चनपुर, चैत्र २१ गते ।

सप्तरीको कञ्चनरुप नगरपालिका वडा नं. १ स्थित बैरवामा स्थानीय समुदाय र प्रहरीबीच साझेदारी कार्यक्रम सम्पन्न भएको छ । कार्यक्रममा अवैध मादक पदार्थको विक्री, चोरी नियन्त्रण, तथा सडक सफाइ जस्ता महत्त्वपूर्ण विषयमा गहन छलफल गरिएको थियो ।
कञ्चनपुरका प्रहरी निरीक्षक (इन्स्पेक्टर) लेख बहादुर बिष्टले अपराध नियन्त्रण तथा सामाजिक स्थायित्वका लागि समुदायको सहयोग अपरिहार्य रहेको बताएका छन् । उनले भने, “तपाईंहरूको सहयोगबिना प्रहरीले केही गर्न सक्दैन । प्रहरी मात्र सक्रिय भए पनि समस्या आउन सक्छ, त्यसैले सबैको साथ र सहयोग आवश्यक छ ।“
उनका अनुसार धेरैजसो समस्या घरायसी कारणले उत्पन्न हुने गर्छन् ।  उनले जोड दिँदै भने, “घरको समस्या घरमै समाधान गर्नुपर्छ । जब आमाहरू घरबाहिर निस्किनुहुन्छ, समस्या उत्पन्न हुन्छ । अरू मानिस तपाईंलाई लडाएर रमाइलो हेर्न खोज्छन् । भाइभाइ फुट्दा तेस्रो पक्षले फाइदा उठाउँछ ।“
बिष्टले गाउँबाहिर गएपछि थप समस्या देखिन सक्ने चेतावनी दिँदै, अपराध तथा अवैध क्रियाकलाप नियन्त्रणका लागि प्रहरी निरन्तर सक्रिय रहेको बताए । उनले अवैध रूपमा सञ्चालन भइरहेको मादक पदार्थ तथा गाजा विक्रीवितरण नियन्त्रण गर्न प्रहरी प्रतिबद्ध रहेको उल्लेख गरे ।
“समस्या बुझेर हामी निवेदन थाना मै लिन्छौं । गाउँमा अवैध रूपमा चलिरहेका मादक पदार्थ र गाजालाई नियन्त्रण गर्न चाँडै नै कारबाही गरिनेछ,“ उनले थपे ।
समुदायको ऐक्यबद्धता र प्रहरीको सहकार्यद्वारा मात्रै सामाजिक अपराध न्यूनीकरण गर्न सकिने भन्दै बिष्टले सचेत रहन आग्रह गरेका छन् ।
कञ्चनरुप–१ का वडा अध्यक्ष रब्बान खानले दुई वर्षअघि भएको संजाय राउथको हत्या प्रकरणको निष्पक्ष छानबिन गर्न आग्रह गरेका छन् । प्रहरी अधिकारीहरूलाई सम्बोधन गर्दै उनले भने, “२०८० सालमा हाम्रो अल्पसंख्यक समुदायमा एउटा गम्भीर घटना भयो— संजाय राउथको घाटी रेटेर हत्या गरियो । तर, दुई वर्ष बितिसक्दा पनि दोषी पत्ता लगाउन सकिएको छैन ।“
उनी लगातार प्रहरी प्रशासनलाई यस विषयमा जानकारी गराउँदै आएको उल्लेख गर्दै भन्छन्, “नव नियुक्त प्रहरी नायब निरीक्षकले यस मुद्दालाई गम्भीर रूपमा लिएर छानबिन अगाडि बढाउनु आवश्यक छ । यदि समयमै न्याय पाइन, भने यस्ता घटनाहरू दोहोरिन सक्छन्, जसले समाजमा त्रास फैलाउँछ ।“
खानले प्रहरी कार्यालयअगाडि नागरिकहरूलाई जानकारी दिने उद्देश्यले “निवेदन निःशुल्क छ“ भन्ने सूचना बोर्ड राख्न पनि आग्रह गरे । “यसले नागरिकहरूलाई थाहा हुन्छ कि उनीहरूले प्रहरीसमक्ष निःशुल्क रूपमा आफ्नो गुनासो राख्न सक्छन्,“ उनले भने ।
साथै, उनले अवैध रूपमा सञ्चालन भइरहेका मदिरा पसलहरू बन्द गर्न र मात्र लाइसेन्सप्राप्त व्यवसायीहरूलाई सञ्चालन गर्न दिनुपर्ने माग गरे । “जो बिना अनुमति मदिरा बेचिरहेका छन्, तिनीहरूको पसल तुरुन्तै बन्द गरिनुपर्छ । जससँग लाइसेन्स छ, उनीहरूलाई मात्र सञ्चालन गर्न दिइनुपर्छ,“ उनले भने । 
खानले समाजमा सुरक्षाको प्रत्याभूति दिलाउन प्रहरी प्रशासनलाई आवश्यक कदम चाल्न आग्रह गर्दै न्यायिक प्रक्रिया निष्पक्ष रूपमा अघि बढाउनुपर्नेमा जोड दिए ।
कञ्चनरुप–१ का वार्ड अध्यक्ष पदका प्रत्याशी रामदेव शर्माले समुदायमा बढ्दो अवैध मदिरा विक्री तथा त्यसले सिर्जना गरेको सामाजिक समस्याबारे गम्भीर चिन्ता व्यक्त गरेका छन् । साझेदारी कार्यक्रममा प्रहरी अधिकारीहरूका बीच आफ्नो मन्तव्य राख्दै उनले भने, “हाम्रो गाउँमा बिना लाइसेन्सका मदिराका पसलहरू अनियन्त्रित रूपमा सञ्चालन भइरहेका छन् । राति १२ बजेसम्म खुला हुने यी पसलहरू कुनै पनि कानुनी दायरामा छैनन् ।“
उनले मदिरा सेवनपछि युवाहरूले लापरवाह ढंगले मोटरसाइकल चलाउँदा दुर्घटनाका घटनाहरू बढ्दै गएको उल्लेख गरे । “युवाहरू रक्सी सेवन गरी तीव्र गतिमा सवारी साधन चलाउँछन्, जसले दुर्घटनाको जोखिम बढाएको छ,“ उनले भने ।
पूर्व डिएसपी महेन्द्र नेपालको कार्यकालमा केही झगडालाई राजनीतिक हस्तक्षेपका कारण अभद्र व्यवहारको मुद्दा बनाइने गरेको स्मरण गर्दै शर्मा भन्छन्, “जो दोषी छ, उसले कानुनबमोजिमको सजाय पाउनु पर्छ, तर निर्दोषलाई कानुनी कारबाहीमा तान्नु गलत हो ।“
उनले निष्पक्ष कानुनी व्यवस्था लागू गर्नुपर्ने माग गर्दै, समाजमा शान्ति, अनुशासन, र न्याय सुनिश्चित गर्न आफ्नो प्रतिबद्धता व्यक्त गरे ।
 उक्त कार्यक्रम कञ्चनरुप–१ का वडा अध्यक्ष पदका प्रत्याशी रामदेव शर्माको घरमा सम्पन्न भएको हो । कार्यक्रममा कञ्चनपुरका प्रहरी सई सुबोस कुमार यादव (एसके), अर्जुन यादव, सोही नगरपालिकाका वडा सदस्य कलिम शेख, दुर्गानन्द यादव, समाजसेवीहरू तथा विभिन्न राजनीतिक दलका प्रतिनिधिहरूको उपस्थिति रहेको थियो । । ईलाका प्रहरी कार्यलाय कञ्चनपुर सप्तरीको आयोजनामा सम्पन्न भयो ।