पर्सा, २३ चैत l पर्सागढी नगरपालिका-३ झब्राबाट अवैध लागूऔषध गाँजा ८ केजी र ४ लिटर अवैध मदिरा सहित ३ जनालाई आइतबार बिहान प्रहरीले पक्राउ गरेको छ । पक्राउ पर्नेहरुमा वीरगंज महानगरपालिका-३१ मिलन चौक बस्ने ४५ वर्षीय समसुदिन मिया अंसारी, सोही ठाउँ बस्ने २० वर्षीय शेष अख्तार मियाँ र धनुषा जनकपुर उपमहानगरपालिका-१३ बस्ने ५० वर्षीय जिबछ महतो रहेका छन् । विशेष सूचनाको आधारमा जिल्ला प्रहरी कार्यालय पर्सा र अस्थाई प्रहरी पोष्ट बिरुवागुठीबाट संयुक्त रुपमा खटिएको प्रहरीले उनीहरुलाई उक्त परिमाणको लागूऔषध गाँजा र मदिरा सहित फेला पारी पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।