कञ्चनपुर,जेष्ठ १४ गते । सप्तरीको छिन्नमस्ता गाउँपालिका–६ कोचाबखारीबाट नियन्त्रित लागूऔषधक पक्राउ गरिएको छ ।

भारतबाट नेपालतर्फ स२प ८३९३ नम्बरको मोटरसाइकलमा पछाडी खैरौ रङ्गका झोलामा लुकाएर ल्याउँदै गरेको नियन्त्रित लागूऔषध १ सय एमएलको डाईलेक्स डिसी तीन सय बोतल ,नाईट्रोसन ८० ट्याव्लेट र  स्पास्मो प्रोक्सिभन २३ पत्ता (५५२ पिस) बरामद गरेको छ । तस्करहरुले मोटरसाइकल छोडेर गएको  र एक थान मोबाइल समेत बरामद भएको जिल्ला प्रहरी कार्यालय सप्तरीका प्रवक्ता डिएसपी तिलक भारतीले जनाएको छ ।

मंगलबार सुनसरी कोशी गाउँपालिका १ बाट नियन्त्रित लागूऔषध १ सय एमएलको डाईलेक्स डिसी ४७ बोतल, नाईट्रोसन ९० ट्याव्लेट, स्पास्मो प्रोक्सिभन २३ क्याप्सुल, कौडा २१ थान र प्लाष्टिकको खेलौनावाला पेस्तोल १ थान सहित ३ जनालाई मंगलबार बिहान प्रहरीले पक्राउ गरेको छ ।

पक्राउ पर्नेहरुमा कोशी गाउँपालिका(१ लौकही बस्नेहरु २२ वर्षीय सोशिल साह, ३० वर्षीय अमन कुमार साह र १९ वर्षीय गणेश कुमार साह रहेका छन् । लकडाउनको निग्रानीको लागि खटिएको प्रहरीले गस्ती गर्ने क्रममा उक्त ठाउँस्थित बाँसघारीमा सागसब्जी बोक्ने झोला बोकेका उनीहरुलाई शंकास्पद अवस्थामा देखेर जाँच गर्न लाग्दा बोकेको झोला छाडेर भाग्न खोजेपछि नियन्त्रणमा लिई तलासी गर्दा उक्त नियन्त्रित लागूऔषध र अमनकुमारको साथमा उक्त प्लाष्टिकको खेलौनावाला पेस्तोल १ थान फेला परेको हो ।

निजहरु उपर लागूऔषध मुद्धामा अनुसन्धान तथा कारवाही भइरहेको जिल्ला प्रहरी कार्यालय सुनसरीले जनाएको छ ।